" كن أنت التغيير الذي تريد أن تراه بالعالم" 

غاندى

خطرت على بالي

" خطرت على بالي" هي مبادرة إنسانية بتهدف انها تقوي أواصر المحبة بالمجتمع  وتقرب الناس من بعض، وتخلينا نشعر مع الأشخاص اللي عم بمرو بألم حارق أو بظروف صعبة.

المبادرة بكل بساطة انك تكتب كرت أو رسالة لشخص بحياتك بتعرفه شخصياُ أو ما بتعرفه، وتدعمه معنوياً، تسنده وتوقف جنبه، وتخلي يشعر انه هو مش لحاله بمحنته. 

لمين بدك تعطي الكرت أو الرسالة ؟

  • أي شخص من معارفك بمر بظروف صعبة، ممكن يكون حدا من أقربائك، أصحباك، زملائك بالعمل

  • أي شخص من معارفك قطعت العلاقة في لأي سبب ولسة بتفكر في وحابب تتواصل معا

  • أي شخص ما بتعرفه شخصياً بس بتشوفو كل يوم وعم بمر بظروف صعبة ، ممكن عند بيتك، شغلك، أو أي مكان بتتردد علي كتير

  • أي شخص ما بتعرفه شخصياً ولا بتشوفو بس بتعرف انه عم بمر بظروف صعبة: مريض بمستشفى السرطان، شخص ببيت العجزة، شخص فقد حدا من أهله، شخص محتاج، أو طفل بمركز الأيتام، او أي شخص بأي مركز آخر عم بمر بظروف صعبة

  • بتقدر تكتب أي عدد من الكروت اللي بدك أيها، ورح نعرض كل الكروت على الصفحة الا اذا كنت مكرر الحكي نفسو

 

نصائح لكتابة الكرت أو الرسالة، مش بالضرورة تلتزم فيهم/ خلي الموضوع بسيط وسهل:

  • أهم نقطة انك تشعر الطرف التاني انك واقف جنبه وانك عم تدعمه، وتخفف عنه الألم اللي عم بمر فيه

  • استخدم مصطلح "خطرت على بالي" أقل ما فيها مرة وحدة

  • شارك قصة من حياتك كنت فيها بألم أو تحدي كبير وكيف طلعت منه

  • أذكر ليش عم تفكر بالشخص الأخر

  • اتمناله أمنية

  •  احكي قصة تلهم فيها الشخص اللي رح يستلم الكرت

  • بتقدر ترسم، تلون، تكتب، تلصق ملصقات، طبع أو أي مادة بدك اياها

  • آخر شيئ، اسأل حالك لو انت استلمت هادا الكرت كيف رح تحس؟ رح تكون مبسوط؟

  • اذا كانت الرسالة موجه لشخص من معارفك الشخصيين بتقدر تكتب اسمه واسمك الكامل

  • اذا كانت الرسالة موجهة لشخص ما بتعرفه بس بتشوفه أو حد حكالك عنو ورح تعطي الكرت شخصياً حاول تعرف اسمه واذكر بالرسالة ليش عم تعطي الكرت، وكيف تعرفت على هادا الشخص

  • في حال ما بتعرف الشخص الآخر بالمرة ولا عمرك شوفته أو الرسالة موجهة لشخص بأحد المراكز العلاجية يفضل ما تكتب اسمك الكامل ولا تذكر أي معلومة شخصية

 

قبل ما تبعت الكرت أو الرسالة:

  • صّور الكرت أو الرسالة وحمل الصورة على أي منصة تواصل اجتماعي واستخدم الهاشتاغ #خطرت_على_بالي

  • أو صّور الكرت أو الرسالة ابعتلنا إياها على صفحة صلاح على الفيسبوك أو على صفحة المبادرة على الانستغرام Khatart3alaBali - اضغط هنا

 

 

كيف بدك تعطي الكرت أو الرسالة:

  • اذا الشخص بتعرفه أو بتشوفه شخصياً فبتقدر تعطي الرسالة بنفسك أو بتقدر تطلب من شخص بعرفه يوصله الرسالة

  • اذا الشخص ما بتعرفه بالمرة ولا عمرك شوفته بتقدر تعطي الكرت أو بتقدر تطلب من أحد الأشخاص اللي بعرفوا يعطوا الكرت  

  • اذا الرسالة موجهة لشخص بأحد المراكز العلاجية، فتوجه عند إدارة المركز واطلب منهم يختاروا شخص ويعطوا الكرت بأنفسهم

تعرف على برنامج سيطر مع صلاح

  • Black Instagram Icon